AsiaUrdu

ہیومن رائٹس واچ نے امریکا اور ایران کے رہنماؤں کو خبردار کیا ہے کہ شہری تنصیبات کو جان بوجھ کر نشانہ بنانا بین الاقوامی جنگی قوانین کی سنگین خلاف ورزی ہے۔

تنظیم کی مشرق وسطیٰ و شمالی افریقہ کی ڈائریکٹر بلقیس جراح نے کہا کہ دونوں ممالک کے حکام کی جانب سے شہری تنصیبات پر حملوں کی دھمکیاں تشویشناک ہیں۔

ان کے مطابق حالیہ کشیدگی کے دوران ایران، خلیجی ممالک اور اسرائیل میں شہریوں اور ان کی املاک کو غیر قانونی طور پر نشانہ بنایا گیا، جو بین الاقوامی قوانین کی خلاف ورزی ہے۔

بلقیس جراح نے زور دیا کہ عالمی برادری کو امریکا اور ایران پر واضح کرنا چاہیے کہ جنگی جرائم میں ملوث افراد کو انصاف کے کٹہرے میں لایا جائے گا، جس کے لیے عالمی دائرہ اختیار کے تحت کارروائی بھی کی جا سکتی ہے۔