AsiaUrdu

ٹیسلا اور اسپیس ایکس کے سربراہ ایلون مسک نے خبردار کیا ہے کہ مصنوعی ذہانت کی تیز رفتار ترقی کے باعث یہ ٹیکنالوجی آئندہ پانچ برسوں میں انسانی ذہانت سے بھی آگے نکل سکتی ہے۔ ایک انٹرویو میں انہوں نے کہا کہ اے آئی کی صلاحیتیں مسلسل بڑھ رہی ہیں اور آنے والے وقت میں یہ تقریباً ہر شعبے میں انسانوں سے بہتر کارکردگی دکھا سکتی ہے۔

انہوں نے کہا کہ اگلی ایک دہائی کے دوران انسانوں کے لیے اس جدید ٹیکنالوجی پر مکمل کنٹرول برقرار رکھنا مشکل ہو سکتا ہے۔ ایلون مسک کے مطابق مصنوعی ذہانت جہاں بے مثال ترقی اور خوشحالی لا سکتی ہے، وہیں اس کے ساتھ ممکنہ خطرات بھی موجود ہیں جن کے لیے دنیا کو ابھی سے تیار ہونا ہوگا۔

انہوں نے تجویز دی کہ بڑی ٹیکنالوجی کمپنیاں آپس میں تعاون بڑھائیں اور اے آئی سسٹمز کی سکیورٹی سے متعلق معلومات شیئر کریں۔ ان کا کہنا تھا کہ نئے ماڈلز جاری کرنے سے پہلے ان کا مکمل جائزہ لینا ضروری ہے تاکہ کسی بھی بڑے خطرے سے بچا جا سکے۔