AsiaUrdu

وزیراعظم شہباز شریف نے کہا ہے کہ پی آئی اے کی بحالی کے لیے انقلابی سرمایہ کاری کی بنیاد رکھ دی گئی ہے اور نجکاری کے عمل کا پہلا مالیاتی مرحلہ کامیابی سے مکمل ہو گیا ہے۔

اپنے بیان میں انہوں نے کہا کہ مینجمنٹ کنٹرول سرمایہ کار کنسورشیم کو منتقل ہونے سے قومی ایئرلائن کے ایک نئے دور کا آغاز ہو گیا ہے، جو معیشت کے لیے مثبت پیش رفت ہے۔

وزیراعظم کے مطابق یہ اقدام پاکستان پر سرمایہ کاروں کے اعتماد کو مزید مضبوط کرے گا اور مستقبل میں مزید سرمایہ کاری کے مواقع پیدا ہوں گے۔

انہوں نے نائب وزیراعظم اسحاق ڈار، فیلڈ مارشل سید عاصم منیر، مشیر برائے نجکاری محمد علی اور وزیر خزانہ محمد اورنگزیب کی خدمات کو سراہتے ہوئے کہا کہ ان کی محنت سے یہ اہم کامیابی حاصل ہوئی۔

شہباز شریف نے اس عزم کا اظہار کیا کہ حکومت معیشت کی بہتری کے لیے اقدامات جاری رکھے گی تاکہ ملک کو ایک مضبوط اور خوشحال مستقبل کی جانب لے جایا جا سکے۔