AsiaUrdu

نئی آٹو پالیسی پر جاری مذاکرات تاحال کامیاب نہیں ہو سکے جس کے باعث حکومت نے پرانی آٹو پالیسی کو مزید ایک سال جاری رکھنے پر غور شروع کر دیا ہے۔ ذرائع کے مطابق نئی پالیسی پر بین الاقوامی مالیاتی ادارے اور متعلقہ بورڈ کے ساتھ مشاورت جاری ہے لیکن ابھی تک کوئی حتمی فیصلہ نہیں ہو سکا۔

حکام کا کہنا ہے کہ گزشتہ آٹو پالیسی پر مکمل عملدرآمد بھی ممکن نہیں ہو سکا، جبکہ نئی پالیسی کے نفاذ میں تاخیر پر تشویش پائی جا رہی ہے۔ حکومت چاہتی ہے کہ نئی آٹو پالیسی کو سرمایہ کار دوست بنایا جائے تاکہ سرمایہ کاری اور روزگار کے مواقع میں اضافہ ہو سکے۔

مجوزہ پالیسی میں گاڑیوں کے لیے عالمی معیار کے سیفٹی سٹینڈرڈز اپنانے اور ان پر عمل نہ کرنے والی کمپنیوں پر جرمانے کی تجویز دی گئی ہے۔ اس کے علاوہ الیکٹرک اور ہائبرڈ گاڑیوں کے فروغ کے لیے بھی اقدامات شامل کیے گئے ہیں۔

دوسری جانب مختلف وزارتوں کے درمیان سٹینڈرڈز کے معاملے پر اختلافات سامنے آئے ہیں جس پر پارلیمانی کمیٹی نے تشویش کا اظہار کیا ہے۔ حکام کے مطابق ای وی بائیکس کے شعبے میں پیش رفت ہو رہی ہے لیکن چارجنگ سٹیشنز کی عدم دستیابی اور مقامی بیٹریوں کی کمی جیسے مسائل بدستور موجود ہیں۔

مزید بتایا گیا کہ ای وی بائیکس کے لیے حکومت نے سبسڈی بھی مختص کر رکھی ہے، تاہم اس شعبے میں بہتر نظام اور واضح پالیسی کے لیے متعلقہ اداروں کے درمیان تعاون ضروری ہے۔