AsiaUrdu

ملک میں پن بجلی کی پیداوار میں اضافے کے باعث بجلی کی مجموعی فراہمی میں بہتری آئی ہے اور پیک اوقات میں لوڈشیڈنگ میں نمایاں کمی دیکھنے میں آئی ہے۔

Power Division Pakistan کے ترجمان کے مطابق 17 اپریل سے بجلی کی صورتحال میں بہتری آئی ہے اور رات کے پیک اوقات میں تقریباً 5000 میگاواٹ پن بجلی پیدا کی جا رہی ہے۔

ترجمان کا کہنا ہے کہ 17، 18 اور 19 اپریل کو رات کے پیک اوقات میں لوڈ منیجمنٹ نہیں کی گئی، جبکہ 20 اپریل کو بیشتر علاقوں میں صرف ایک گھنٹے کی لوڈ منیجمنٹ کی گئی۔ تاہم کچھ علاقوں میں، جن میں گیپکو اور سیپکو شامل ہیں، دو گھنٹے تک لوڈ منیجمنٹ کی گئی۔

مزید بتایا گیا کہ مائع قدرتی گیس سے چلنے والے تقریباً 5500 میگاواٹ کے بجلی گھروں سے فی الحال پیداوار نہیں ہو رہی، تاہم گیس کی دستیابی بہتر ہونے پر ان سے بجلی کی پیداوار دوبارہ شروع ہو جائے گی۔

حکام کے مطابق بجلی چوری اور لائن لاسز کی بنیاد پر لوڈ منیجمنٹ پالیسی پر عمل جاری رہے گا۔