AsiaUrdu

سیالکوٹ: محکمہ زراعت نے کاشتکاروں کو ہدایت کی ہے کہ وہ بھنڈی توری کی بوائی سے قبل بیج کو پھپھوند کش زہر لگا کر کاشت کریں تاکہ فصل کو بیماریوں سے محفوظ بنایا جا سکے۔

زرعی ماہرین کے مطابق بھنڈی توری موسم گرما کی ایک اہم اور نقد آور فصل ہے جس کی کاشت کا موزوں وقت مارچ سے وسط اپریل تک ہوتا ہے۔ اگر کاشت تاخیر سے کی جائے تو فصل کو جڑ اکھیڑا اور دیگر بیماریوں کا زیادہ خطرہ لاحق ہو جاتا ہے۔

محکمہ زراعت کے حکام نے مشورہ دیا ہے کہ کاشتکار پچھیتی بوائی کی صورت میں بیج کو ڈائی تھین یا کسی معیاری پھپھوند کش زہر سے ٹریٹ کریں تاکہ بیماریوں سے بچاؤ ممکن ہو سکے۔

مزید برآں، اگر فصل میں پیلا روگ ظاہر ہو تو فوری طور پر مناسب زرعی ادویات کا سپرے کیا جائے تاکہ نقصان کو کم سے کم کیا جا سکے۔

ماہرین نے کہا ہے کہ بروقت احتیاطی تدابیر اختیار کر کے نہ صرف فصل کو بیماریوں سے محفوظ بنایا جا سکتا ہے بلکہ پیداوار میں بھی خاطر خواہ اضافہ ممکن ہے۔