AsiaUrdu

ملتان: پاکستانی آم کو یورپی مارکیٹ تک رسائی دلانے اور ایکسپورٹ کوالٹی بہتر بنانے کے لیے Pakistan Horticulture Development and Export Company نے رواں سال بھی آم کے کاشتکاروں کو ڈیڑھ لاکھ مینگو پروٹیکشن بیگز مفت فراہم کرنے کا فیصلہ کیا ہے۔

اس اقدام کا مقصد پاکستانی آم کو عالمی معیار کے مطابق تیار کرنا ہے، کیونکہ دنیا بھر میں پاکستانی آم اپنے منفرد ذائقے اور خوشبو کی وجہ سے خاص پہچان رکھتا ہے۔

ماہرین کے مطابق مینگو پروٹیکشن بیگز کے استعمال سے آم کی فصل فروٹ فلائی اور دیگر نقصان دہ کیڑوں سے محفوظ رہتی ہے۔ اس کے ساتھ ساتھ اسپرے کے کم استعمال کی وجہ سے آم زیادہ محفوظ اور ایکسپورٹ کوالٹی بن جاتا ہے، جس سے کاشتکاروں کی آمدن میں بھی نمایاں اضافہ ممکن ہے۔

وفاقی حکومت کے اس منصوبے کے تحت پاکستانی آم کو جاپان، جنوبی کوریا، European Union، امریکہ اور چین سمیت اہم عالمی منڈیوں تک رسائی حاصل ہو سکے گی، کیونکہ ان ممالک میں صرف بیماریوں سے پاک اور معیاری طریقے سے تیار کردہ آم کی درآمد کی اجازت دی جاتی ہے۔

اس سلسلے میں 6 مئی کو صبح 10 بجے قاسم بیلہ ملتان میں ایک سیمینار منعقد کیا جائے گا، جس میں کاشتکاروں کو مینگو پروٹیکشن بیگز کے استعمال کی باقاعدہ تربیت دی جائے گی۔ اس سے قبل Trade Development Authority of Pakistan کے دفتر میں مثالی کاشتکاروں میں یہ بیگز مفت تقسیم کیے جائیں گے۔