AsiaUrdu

محکمہ زراعت پنجاب نے کپاس کے کاشتکاروں کو ہدایت کی ہے کہ وہ ترجیحاً 15 مئی تک کپاس کی کاشت مکمل کریں تاکہ بہتر پیداوار حاصل کی جا سکے۔

ترجمان کے مطابق کاشت سے قبل منظور شدہ بی ٹی اقسام کا بیج استعمال کیا جائے جبکہ کم از کم 10 فیصد رقبے پر نان بی ٹی اقسام کی کاشت بھی ضروری ہے تاکہ کیڑوں میں مزاحمت پیدا نہ ہو۔

کاشتکاروں کو سرٹیفائیڈ اور مستند بیج استعمال کرنے کی ہدایت بھی دی گئی ہے۔ اگر بیج کا اگاؤ 75 فیصد سے زیادہ ہو تو مناسب مقدار میں بیج استعمال کیا جائے تاکہ بہتر فصل حاصل ہو سکے۔

ماہرین نے یہ بھی سفارش کی ہے کہ بیج کو بوائی سے قبل کیڑے مار زہر سے ٹریٹ کیا جائے تاکہ ابتدائی مرحلے میں فصل کو رس چوسنے والے کیڑوں خصوصاً سفید مکھی سے محفوظ رکھا جا سکے۔

محکمہ زراعت کے مطابق کپاس کی کاشت پٹریوں پر کرنا زیادہ مؤثر ہے، جبکہ پانی کی دستیابی کے مطابق مختلف طریقوں سے بوائی کی جا سکتی ہے۔ مناسب فاصلہ اور پودوں کی مطلوبہ تعداد برقرار رکھنا بھی بہتر پیداوار کے لیے ضروری ہے۔