AsiaUrdu

چین کی معروف زرعی کمپنیوں کے چیف ایگزیکٹو آفیسرز (سی ای اوز) پر مشتمل ایک اعلیٰ سطحی وفد نے محمد نواز شریف زرعی یونیورسٹی ملتان کا دورہ کیا۔ اس دورے کا مقصد پاکستان اور چین کے درمیان زرعی شعبے میں دوطرفہ تعاون کو فروغ دینا، سرمایہ کاری کے مواقع کا جائزہ لینا اور مشترکہ تحقیقی و تعلیمی منصوبوں کے امکانات پر تبادلہ خیال کرنا تھا۔

ترجمان زرعی یونیورسٹی کے مطابق دورے کے دوران چینی وفد نے یونیورسٹی انتظامیہ اور فیکلٹی اراکین سے ملاقات کی، جس میں زرعی تحقیق، جدید زرعی ٹیکنالوجی، معیاری بیجوں کی تیاری، مشینی زراعت، ویلیو ایڈیشن اور طلبہ و اساتذہ کے تبادلہ پروگرام جیسے اہم موضوعات پر تفصیلی گفتگو کی گئی۔

ملاقات کے دوران دونوں فریقین نے اس امر پر زور دیا کہ پاکستان اور چین کے مابین زرعی تعاون کو مزید مستحکم کرنے کے وسیع مواقع موجود ہیں، جو کسانوں کی فلاح و بہبود، زرعی پیداوار میں اضافے اور جدید زرعی نظام کے فروغ میں اہم کردار ادا کر سکتے ہیں۔

اس موقع پر پاکستان اور چین کے درمیان سفارتی تعلقات کے قیام کی 75ویں سالگرہ کے حوالے سے ایک پروقار تقریب بھی منعقد کی گئی، جس میں کیک کاٹا گیا اور پاک چین دوستی، باہمی اعتماد اور دیرینہ تعلقات کو خراجِ تحسین پیش کیا گیا۔

یونیورسٹی انتظامیہ نے چینی وفد کے دورے کو خوش آئند قرار دیتے ہوئے اس امید کا اظہار کیا کہ یہ دورہ مستقبل میں عملی تعاون، مشترکہ منصوبوں اور زرعی شعبے کی پائیدار ترقی کے لیے ایک سنگِ میل ثابت ہوگا۔

اس موقع پر ڈین ایگریکلچر پروفیسر ڈاکٹر حماد ندیم طاہر، ڈائریکٹر او آر آئی سی پروفیسر ڈاکٹر مبشر مہدی، پروفیسر ڈاکٹر سلمان قادری، ڈائریکٹر اسٹیٹ مینجمنٹ ڈاکٹر تنویر احمد، ڈائریکٹر ایکسٹرنل لنکیجز ڈاکٹر آصف خان، ڈائریکٹر کیو ای سی ڈاکٹر عمار مطلوب، ڈاکٹر عثمان جمشید، انعم بخاری سمیت دیگر فیکلٹی اراکین بھی موجود تھے۔